PNP pumalag sa ‘Ang Probinsyano’
Idudulog SA MTRCB
MANILA, Philippines — Ikinadismaya ni Philippine National Police (PNP) Chief P/Director General Oscar Albayalde ang masamang imahe ng kapulisan sa teleseryeng “Ang Probinsyano” na pinagbibidahan ng aktor na si Coco Martin.
Ayon kay Albayalde, plano nilang lumiham sa producer ng teleseryeng ‘Probinsyano’ upang ipatigil ang pagpo-portray sa masamang imahe ng mga pulis.
Sinabi ni Albayalde na nakipagpulong na siya kay Department of Interior and Local Government (DILG) Secretary Eduardo Año at dito’y kanilang tinalakay ang pagpapadala ng liham sa Movie and Television Review and Classification Board (MTRCB) at maging sa producer ng teleserye.
“Well unang-una, we want to probably have an audience and probably kung hindi man nila matigil ‘yun e mabago man lang ‘yung pagpo-portray sa PNP.
Sa katunayan, ayon pa kay Albayalde na maging ang Office of the President ay naapektuhan dahilan sa masyadong hindi na pangkaraniwan ang mga nangyayari sa nasabing teleserye.
“It gives us a bad impression actually. It’s a bit unfair to PNP when you portray that kind of (masama) activity that doesn’t really happen in our organization,” paliwanag pa ng Chief PNP.
Samantalang aminado naman si Albayalde na hindi nangyayari sa tunay na buhay na ang Chief PNP ang utak at protektor ng mga organisadong sindikatong kriminal tulad ng drug traffic-king, smuggling at iba pang uri ng illegal na aktibidades.
Inihayag pa ni Albayalde na nakababahala ang nasabing teleserye dahilan bagaman malayo ito sa katotohanan ay malaki ang impluwensya sa netizens na magiging masama ang pagtingin sa kapulisan.
- Latest