No.4 most wanted sa Mandaluyong, huli

MANILA, Philippines — Bumagsak sa kamay ng batas ang isang 29-anyos na No.4 most wanted sa Mandaluyong sa kasong murder matapos masakote ng mga pulis sa Sta. Ana, sa Maynila, kamakalawa ng gabi.

Kinilala ng pulisya ang nadakip na suspek na si Scott Matthew Mandinguiado, alyas ‘Scott Sta. Maria Mandinguiado’.

Ayon sa ulat, sa bisa ng arrest warrant para sa kasong murder na inisyu ni Judge Monique Quisimbing-Ignacio ng Mandalu­yong City RTC, dakong alas-9:00 ng gabi nang dakmain ng mga pulis si Mandinguiado habang nagbabasketbol sa Brgy. Mayo 28 sa Punta, Sta. Ana.

Nabatid na nagtago umano ang suspek matapos na maipalabas ang arrest warrant ng hukuman kung saan makaraan ang isang buwan na surveillance na isinagawa ng pulisya sa kinaroroonan ng suspek batay sa tip ng isang police asset ay wala nang inaksayang panahon ang mga otoridad upang agad na maaresto si Mandinguiado.

Kasalukuyan nang humihimas sa bakal na rehas ang naaarestong suspek.