Guidelines inilabas ng Manila North Cemetery para sa Undas

MANILA, Philippines — Muling nagpaalala ang  pamunuan ng Manila North Cemetery sa publiko na may kaanak na bibisitahin ngayong Undas na may pamantayan para sa paglilinis at pagpipintura ng mga puntod.

Pinapayagan lamang na makapasok ang mga maglilinis at magpipintura hanggang Oktrubre 29.

Ibinabawal din ang pagsusunog ng mga nakolektang basura at sa halip ay dapat na itapon ng maayos sa mga basurahan.

Sa mga maglilibing, hanggang Oktubre 29 na lamang dahil hindi na papayagan na papasukin ang mga sasakyan at paglilibing simula Oktubre 30 hanggang Nobyembre 2.

Sa Nobyembre 1 naman ang Gate 2 at 3 ng sementeryo sa A. Bonifacio Avenue ay bubuksan simula alas-10:00 ng umaga, ngunit maaari lamang itong gamitin ng mga taong papalabas ng sementeryo. Tulad ng dati, dapat ay huwag nang tangkain na magdala ng mga matutulis at matatalim na bagay sa pagbisita sa sementeryo upang hindi na kumpiskahan.

Bukod sa mga armas at patalim, bawal din ang mga flammable materials gaya ng lighter, thinner, alcohol at gas at bawal din ang pagdadala ng mga alagang hayop, sound system, alak at iba pang nakalalasing na inumin at mga gamit sa pagsusugal.

Inaasahan naman ang seguridad na ilalatag ng Manila Police District at  volunteer groups at iba pang health at medical groups para sa mga emergency.