Gusali sa Bilibid, nasunog
MANILA, Philippines — Nilamon ng apoy ang isang bahagi ng gusali ng Medium Security Compound ng New Bilibid Prison (NBP) sa halos limang oras na sunog na umabot sa ikaapat na alarma sa Muntinlupa City, kahapon ng madaling araw.
Lumalabas sa report ng Muntinlupa City Bureau of Fire Protection alas-3:30 kahapon ng madaling araw nang sumiklab ang apoy sa imbakan ng mga Korean handicraft na matatagpuan sa Samsung Building.
Halos natupok ang buong gusali na imbakan ng mga tuyong kugon na ginagawang dekorasyon ng mga preso.
Nabatid na umabot sa ikaapat na alarma ang sunog hanggang sa tumagal ito ng halos limang oras at mag-alas-8:00 na ng umaga nang ideklara itong fire-out. Napag-alaman na malayo naman sa kulungan ng mga preso ang nasunog na gusali, kung kaya’t wala namang nadamay dito.
Patuloy na nagsasagawa ng masusing imbestigasyon ang mga awtoridad hinggil sa insidente.
- Latest