5,000 miyembro ng KKK nanumpa
MANILA, Philippines — Isinagawa kahapon ng umaga ang maraming panunumpa ng mahigit 5,000 miyembro ng partidong samahang KKK (Kapayapaan, Kaunlaran at Katarungan) kay PDP-Laban national president Aquilino ‘Koko’ Pimentel III, sa open auditorium ng Rizal Park, sa Ermita, Maynila.
Sinabi ni dating Manila Mayor Alfredo S. Lim na kung papalarin siyang makabalik ay itutuloy niya ang kampanya na dati niyang nasimulang laban sa kriminalidad at serbisyong ‘womb to tomb.’
Naging mainit naman ang pagtanggap ng mga tagasuporta ni Lim na nagtungo sa Luneta na naghihiyawan sa paglabas niya sa entablado.
Nanawagan si Lim sa publiko na tulungang magtagumpay ang administrasyon ni Pangulong Rodrigo Duterte para sa kapayapaan ng bansa.
Kabilang sa dumalo sa nasabing okasyon sina PDP- Laban Manila Council President Penelope Belmonte, ang executive director din ng National Parks Development Committee, DILG undersecretary Martin Dino, Bucor chief Ronaldo ‘Bato’ dela Rosa at Congressman Monsour del Rosario.
Bukod sa pagkakapareho ng mga isinusulong ng dalawang partido para sa malinis at tapat na pamahalaan, katuwang din umano ng KKK ang PDP-Laban sa pagbabalik ng lahat ng serbisyong libre na kanyang sinimulan bilang alkalde ng lungsod.
“Ating alalahanin, na iisa lang ang ating bansa at ang pagtatagumpay ng namumuno sa ating bansa ay tagumpay nating lahat. Anumang maging kabiguan ng administrasyong ito ay kabiguan na tayo ring mga Pilipino ang siyang babalikat,” dagdag pa ni Lim.
- Latest