Empleyado ng MMDA, huli sa droga
MANILA, Philippines — Kalaboso ang isang 19- anyos na empleyado ng Metro Manila Development Authority (MMDA) matapos itong mahulihan ng illegal na droga sa isinagawang buy bust operation sa San Juan City kamakalawa ng hapon.
Kinilala ni San Juan City Police Chief P/Sr. Supt. Dindo Reyes ang naarestong suspect na si Jayson Planco, alyas Jayson Bulate, ng Brgy. Batis ng lungsod.
Ayon sa opisyal, si Planco ay empleyado ng MMDA bilang kaminero o tagawalis sa kalye sa ilalim ng Out of School Youth Serving Towards Economic Recovery (OYSTER) Program ng ahensya simula noong Setyembre 18 o dalawang araw bago ito masakote.
Bandang alas-4:15 ng hapon nitong Huwebes, ayon sa opisyal nang masakote si Planco ng mga operatiba ng Station Drug Enforcement Unit (SDEU) sa Brgy. Batis ng nabanggit na lungsod.
Nabatid na bago ito, ay nakipagtransaksyon ang informer ng SDEU sa isang nagpakilalang alyas Melvin na bibili ng shabu kung saan ay napagkasunduan na sa Brgy. Batis isagawa ang bentahan.
Si alyas Melvin ay sangkot sa talamak na pagbebenta ng droga pero hindi ito sumipot sa pinagkasunduang lugar kung saan ang suspect ang nagdala ng ibinebentang droga.
Arestado naman ang suspect sa aktong iniaabot ang dalawang plastic sachet ng shabu at nabawi rin ang P 500 marked money.
Nadiskubre pa na 15-anyos pa lamang ay nagsimula nang magtulak ng droga at marijuana ang nadakip at nakatala sa drug watch list. Sumuko na ito sa ‘Oplan Tokhang’ noong 2016 pero sa kabila nito ay nagpatuloy sa pagtutulak ng droga.
- Latest
