Misis utas sa selosong mister
Ginulpi, inatado ng saksak
MANILA, Philippines — Sinasabing sabog sa droga at matinding paninibugho ang nagtulak sa isang mister upang mapatay ang kanyang misis nang gulpihin niya ito at walang habas na inatado ng saksak, naganap sa Valenzuela City, kamakalawa ng gabi.
Sanhi ng maraming saksak na tinamo sa iba’t ibang bahagi ng katawan, nasawi noon din ang biktimang si Maricar Sapian, 42-anyos, nakatira sa Libis, Cabatuhan, Brgy. Gen. T. De Leon, ng naturang lungsod habang pinaghahanap naman ang tumakas niyang mister na si Nicanor Paul Fernandez, 43-anyos, pahinante ng isang delivery truck.
Sa ulat ng pulisya, alas-8:00 ng umaga nang maganap ang krimen sa loob ng bahay ng mag-asawa. Nabatid na kinompronta umano ng mister ang kanyang misis dahil sa umano’y panlalalaki nito.
Pinagsusuntok ng suspek ang kanyang misis at kumuha ng kutsilyo sa kusina. Pumagitna naman ang anak nilang babae na menor-de-edad ngunit maging ito ay sinuntok din ng suspek at nawalan ng malay.
Dito ay wala nang habas na inundayan ng saksak ng suspek ang biktima hanggang sa duguang bumulagta saka mabilis na tumakas.
Rumesponde naman ang mga pulis ngunit hindi na inabutan ang suspek habang narekober ang patalim na ginamit nito na itinago sa gilid ng kanilang bahay.
Ayon sa mga kapitbahay, sobrang seloso umano ng suspek na agad na ginugulpi ang asawa kahit makita lang na may kausap na kapitbahay na lalaki ang misis. Sinabi pa ng mga kapitbahay na lulong umano sa iligal na droga ang suspek.
- Latest