282 pribadong illegal structure sa Makati, giniba
MANILA, Philippines — Giniba ng pamahalaang lungsod ng Makati ang nasa 282 pribadong ilegal na istraktura kaugnay sa pagpapatupad ng road right-of-way at pagtataguyod ng ligtas at “walkable streets” para sa pedestrian at mga motorista.
Inatasan ni Makati City Mayor Abby Binay ang Department of Engineering and Public Works (DEPW) para gibain ang mga ito.
Ang mga apektado sa District 1 ay nasa 68 na ang encroachment ang giniba ng DEPW sa Brgy. Olympia, 42 sa Sta Cruz; 35 sa Pio del Pilar; 29 sa Tejeros; 23 sa Pa-lanan; 19 sa Valenzuela; 16 sa Poblacion; siyam sa Carmona; walo sa La Paz; pito, San Antonio; lima, Bangkal; tatlo, Singkamas; at tig-isa sa Kasilawan at San Isidro.
Sa District 2 ay nasa 12 na encroachment ang giniba at ito ay sa Brgy. Guadalupe Nuevo; tatlo sa West Rembo; at isa sa Comembo.
Sinabi ni Binay, mula pa noong Oktubre, nagbigay na ang DEPW ng mga notice of violation sa mga kinauukulan upang tanggalin ang mga bagay at mga istraktura na lumagpas sa kanilang pro-perty line.
Aniya, nabigyan na ang mga residente ng sapat na panahon upang sumunod sa notices of violation na ibinigay sa kanila, at nilinaw din sa kanila na mahigpit na ipinapatupad ang batas para sa kabutihan ng lahat.
Tiniyak ng alkalde na paninindigan ng kanyang administrasyon ang pangakong bibigyang prayoridad ang kapakanan at kaligtasan ng lahat, lalo na ang mga ordinaryong mamamayan na may karapatan sa malinis at ligtas na daanan.
- Latest