64-anyos na lola binoga ng rider, patay

MANILA, Philippines — Patay ang isang 64-anyos na lola makaraang barilin sa ulo ng isang rider habang naglalakad ang biktima sa Malabon City, ka­makalawa ng hapon.

Nagtamo ng tama ng bala sa ulo ang biktimang nakilalang si Lucila Santos-Marasigan, naninirahan sa C. Arellano Extension, Brgy. Flores, nang naturang lungsod.

Pinaghahanap naman ang nakatakas na suspek na nakilalang si Wilfredo Patola, alyas Laki, 31, at nakatira naman sa Gulayan Street, Santo Niño, Malabon City.

Sa inisyal na ulat ng Malabon City Police, kagagaling lang sa burol ng kanyang namayapang kapatid si Marasigan sa may Eternal Garden sa P. Aquino Ave­nue, Brgy. Tonsuya dakong alas-12:45 ng hapon nang maganap ang krimen.

Naglalakad na pauwi ang matandang biktima kasama ang manugang na si Anna Viray-Marasigan nang dikitan sila ng suspek na si Patola at walang sabi-sabing binaril ito nang malapitan sa ulo.

Agad na tumakas ang salarin habang isinugod ng mga rumespondeng tauhan ng Malabon City Rescue Unit sa Tondo General Hospital ngunit hindi na umabot ng buhay. Patuloy naman ang imbestigasyon ng pulisya sa insidente upang mabatid ang motibo sa pamamaslang habang isang manhunt ope­ration na ang ikinasa upang madakip si Patola.