MRT-3, na-delay ang biyahe
MANILA, Philippines — Naantala ang biyahe ng Metro Rail Transit Line 3 (MRT-3) kahapon ng umaga bunsod ng pagkakaroon ng technical problem sa signalling system ng linya.
Sa inilabas na advisory ng pamunuan ng MRT-3, nabatid na dakong alas-8:25 ng umaga nang magkaroon ng delay sa “arrival at departure” ng mga tren sa mainline ng MRT-3.
“Nagkaroon po ng ‘signalling technical concern’ sa Taft Avenue Station kaya na-delay po ang biyahe ng mga tren” ayon sa MTR-3.
Dahil sa nangyari ay naipon ang maraming pasahero sa mga istasyon ng MRT-3 na karamihan ay mga ‘office worker’ na nagmamadali sana para hindi ma-late sa kani-kanilang mga trabaho.
Agad naman humingi ng paumanhin ang pamunuan ng MRT-3 sa lahat ng naabalang pasahero.
Samantala, kamakalawa ng hapon ay nagkaroon ng aberya ang biyahe ng MRT-3 at kabuuang 600 na pasahero ang pinababa ng tren.
Sinabi ng MRT 3, nagkaroon ng electrical failure sa motor ng isang northbound train bandang alas-3:07 ng hapon.
- Latest