Mag-uutol na ‘tulak,’ arestado
MANILA, Philippines — Arestado sa mga tauhan ng Quezon City Police District (QCPD) ang tatlong magkakapatid na sinasabing ‘tulak’ ng droga sa kanilang lugar sa isinagawang buy bust operation sa Brgy. Holy Spirit, Quezon City, kamakalawa ng gabi.
Kinilala ni QCPD Dir. P/Chief Supt. Joselito Esquivel ang magkakapatid na sina Emelito Cabiling, 37, Angelito Cabiling, 39 at Joselito Cabiling, 43 na pawang residente ng San Isidro St., Brgy. Holy Spirit sa lungsod.
Kasamang nadakip ang kanilang kaibigan na si Edgardo Brabante, 33 ng San Isidro St., Brgy. Holy Spirit.
Nabatid mula kay P/Supt. Joel Villanueva, hepe ng Batasan Police Station 6 (PS 6) na dakong alas-6:00 ng gabi nang isagawa nila ang buy bust operation sa mga suspek makaraan umanong makumpirma na sila ay nagtutulak ng bawal na droga.
Nabawi sa mga suspek ang anim na sachet ng shabu, iba’t-ibang drug paraphernalia at buy bust money.
Sinasabing ang magkakapatid na Cabiling ay bago pa lamang bilang mga ‘drug personalities habang si Brabante ay kabilang na sa ‘drug watch list’ ng QCPD station 6.
Nahaharap ngayon ang mga suspek sa kasong paglabag R.A. 9165 (The Comprehensive Dangerous Drugs Act of 2002).
- Latest
