Holdaper ng Grab driver utas sa parak

MANILA, Philippines — Tumimbuwang ang isang lalaki na sinasabing nangholdap sa isang Grab driver matapos siyang pumalag sa mga otoridad na aaresto sa kanya naganap sa Brgy. Maybunga, lungsod ng Pasig, kahapon ng madaling araw.

Agad na nasawi ang suspek na kinilalang si Efren Abrasado, Jr., nasa hustong gulang, residente ng Job St., Martinville, Manuyo 2, Las Piñas City, habang nakatakas naman ang kanyang hindi pa nakikilalang kasamahan.

Sa ulat ng pulisya, bago naganap ang shootout dakong alas-3:45 ng madaling araw sa Guanio Compound, kanto ng C. Raymundo Avenue,  Brgy. Maybunga ay nagpapahinga noon ang biktimang si Antonio Alison, Grab driver, sa loob ng kanyang silver na Mitsubishi Mirage (NP-9413) sa F. Carunzo St., kanto ng C. Raymundo Avenue, sa Brgy. Caniogan, Pasig City.

Dito ay bigla na lang binuksan ng mga suspek ang hara­pang pintuan ng sasakyan sabay ng pagtutok ng baril at pwersahang kinuha ang kanyang wallet na may lamang P510 at mahahalagang dokumento.

Nang umalis ang mga suspek ay kaagad namang nagtungo sa tanggapan ng Eastern-Criminal Investigation Detection Group (CIDG) si Alison, at inireklamo ang naganap na holdapan.

Mabilis na rumesponde ang mga otoridad sa lugar hanggang sa mamataan ang mga suspek, batay sa deskripsiyong ibinigay ng biktima.

Nang aarestuhin ang mga suspek ay nanlaban ito at pinaputukan ang mga pulis na napilitang gumanti na nauwi sa pagkamatay ni Abrasado, ngunit nakatakas naman ang kanyang kasamahan.

Narekober ng mga pulis mula sa lugar ang isang kalibre .38 revolver na may tatlong bala, ang gray na wallet ng suspek, gayundin ang itim na wallet ng biktima.