Total ban sa provincial bus sa EDSA sa Aug. 15, sisimulan
MANILA, Philippines — Muling inurong kahapon ng Metropolitan Manila Development Authority (MMDA) ang pormal na pagpapatu-pad sa polisiyang maglilimita sa pagpasok ng mga provincial bus sa bahagi ng EDSA na dapat ay sa Agosto 1 na magsisimula ngunit inusog sa Agosto 15.
Sinabi ni MMDA General Manager Jojo Garcia, na nakikipagpag-usap na ang ahensya sa Land Transportation Franchising and Regulatory Board (LTFRB) kaugnay sa pagbabago ng ruta ng mga provincial bus na mula sa hilaga at katimugang bahagi.
“May ilang mga ruta tayong kailangang baguhin para sa ikagiginhawa ng mga pasahero. Pag-uusapan pa namin ito kasama ang mga opisyal ng LTFRB sa Lunes,” ani Garcia.
Sa pahayag ni Garcia, sinabi nitong isasabay ang pagbabawal sa ilang ruta ng mga provincial buses sa EDSA mula Balintawak hanggang Magallanes sa pagbubukas ng Valenzuela Interim Terminal sa Agosto 15.
“Hanggang sa Valenzuela terminal na lamang ang ruta ng ilang piling provincial buses mula sa Norte pero aalamin pa kung anong ruta ang mga ito,” paliwanag ng opisyal.
Ang Southwest Interim Provincial Terminal (SWIPT) naman ang magsisilbing terminal ng mga provincial buses naman na mula sa timog na walang terminal sa Pasay City.
Sa ngayon, ani Garcia, ay palalawigin muna ang dry run para sa regulasyon sa provincial buses hanggang sa Agosto 14.
Mula Hulyo 24 hanggang 27 o unang linggo ng dry run, nasa 477 na provincial buses ang nasita ng MMDA.
- Latest
