Manager ng kompanya, itinumba

MANILA, Philippines — Patay ang isang lalaking manager ng isang kompanya  makaraang pagbabarilin ng dalawang hindi nakikilalang salarin sa Caloocan City, kahapon ng umaga.

Nakilala ang nasawi na si Jayson Cuadrasal, 31, human resource manager ng Goodyear Steel Corporation sa Quezon City at naninirahan sa Lakas ng Mahirap, Brgy. 12, ng naturang lungsod.

Sa ulat ng Caloocan City Police, alas-6:30 ng umaga nang lumabas ng kanyang bahay si Cuadrasal upang bumili ng almusal sa kalapit na tindahan.  Lingid sa kanyang kaalaman, inaabangan na siya ng dalawang salarin na sumunod sa kanya. 

Bago pa makarating sa tindahan, nagbunot na ng baril ang mga suspek at ilang beses na pinaputukan ang biktima saka mabilis na nagsitakas sa hindi mabatid na direksyon. Agad namang nasawi ang biktima dahil sa tinamong mga tama ng bala buhat sa hindi pa batid na kalibre ng baril. 

Iniimbestigahan naman ng pulisya ang posibilidad na may kaugnayan sa ‘labor dispute’ ang insidente makaraang makakuha ng dokumento sa lugar ng krimen na hinihinalang buhat sa New People’s Army (NPA).