Trio umatake sa Malabon: 2 binata utas!
MANILA, Philippines — Patay ang dalawang binata makaraang pagbaba-rilin ng tatlong lalaki na magkakaangkas sa isang motorsiklo habang nag-iinuman ang mga biktima sa loob ng isang tindahan sa Malabon City nitong Sabado ng gabi.
Kinilala ng Malabon City Police, ang mga nasawi na sina Jobert Cabigo, 31-an-yos, at si Jhan Cyril Ignacio, 18, kapwa naninirahan sa may Flerida Street, Brgy. Acacia, ng naturang lungsod habang blangko pa ang pulisya sa pagkakakilanlan ng mga salarin na dalawang lalaki at isang babae.
Sa ulat, alas-8:30 ng gabi habang nag-iinuman ang dalawang biktima kasama ang apat pa nilang kaibigan sa loob ng isang sari-sari store sa Rivera Street, Brgy. Tinajeros nang dumating ang tatlong ‘di kilalang lalaki na lulan ng isang motorsiklo at biglang pinasok ang tindahan. Nang makita ang dalawang biktima, dito na umano sila pinaputukan sa ulo habang hindi naman ginalaw ang iba pang kustomer na nag-iinuman.
Agad na tumakas ang mga salarin patungo sa direksyon ng Barangay Maysilo habang hindi na nagawa pang maisugod sa pagamutan ang dalawang biktima na idineklarang “dead-on-the-spot.”
Narekober ng mga tauhan ng Scene of the Crime Operatives (SOCO) ang apat na nagpaputok na cartridge at tatlong basyo ng bala mula sa kalibre .45 baril.
Blangko pa ang pulisya sa motibo ng pamamaslang na patuloy na iniimbestigahan.
- Latest
