9 patay sa loob ng 6 na buwan
MANILA, Philippines — Siyam na ang namatay sa 36 katao na nagkasakit ng leptospirosis sa Quezon City mula Enero hanggang Hunyo 16 ng taong kasalukuyan.
Ayon ito kay Dr. Rolly Cruz, hepe ng QC Health Department na nagsabing ang sakit na mula sa ihi at dumi ng daga ay napupunta sa tubig baha.
Anya, kailangang mag- ingat ang mga taong lulusong sa baha dahil maaari itong pagmulan ng sakit na leptospirosis.
Sinabi ni Cruz na patuloy ang pagtaas ng kaso ng naturang sakit dahil sa panahon nang tag-ulan kung saan maraming lugar ang madalas na malubog sa tubig baha.
Ang Brgy. Commonwealth ang may pinakamataas na kaso ng leptospirosis na apat ang nagkaroon ng sakit at isa ang namatay mula Enero hanggang Hunyo 16.
Paalala ni Cruz na oras na lumusong sa baha, kaila-ngang magpa check up agad sa health center o sa mga doktor para matiyak na hindi tatamaan ng naturang sakit.
Samantala, anim namang pasyente ng National Kidney and Transplant Institute (NKTI) na mula sa iba’t ibang lugar ang namatay din sa nabanggit na sakit.
Hinikayat naman ni Cruz ang barangay officials sa lungsod na palakasin ang info campaign sa mga nasasakupang lugar upang maiwasan ng mamamayan na magkaroon ng naturang sakit.
- Latest