P20-M libel case isinampa ni Joel Cruz vs Kathelyn Dupaya
MANILA, Philippines — Maliban sa P40 milyon estafa case, P20 milyon libel case naman ang isinampa rin ng tinaguriang ‘Lord of Scents’ na si Joel Cruz laban sa negosyanteng si Kathelyn Dupaya sa Manila Prosecutors Office. Sa panayam kay Cruz, pawang mga kasinungalingan ang sinabi ni Dupaya kung saan naapektuhan ang kanyang produkto na ipinagmamalaki sa buong bansa. Hindi aniya maikakaila na merong mga negatibong reaksiyon laban sa produkto.
Aminado si Cruz na bahagyang bumaba ang sales ng kanilang produkto matapos na siraan ni Dupaya ang kanyang ‘perfume’ na ini-export pa at nakatulong pa sa ekonomiya ng bansa. Aniya, nagbabayad din siya sa BIR at lahat ng dokumento ay kumpleto at maaaring silipin at tignan ng kinauukulan. Ayon naman sa legal counsel ni Cruz na si Atty. Ferdinand Topacio, self serving ang ginawa ni Dupaya nang gumawa ito ng sariling ledger at excel documents upang may ipakitang dokumento.
Una nang nagsampa ng P40 milyon estafa si Cruz laban kay Dupaya matapos na umano’y takbuhan siya nito sa nakuhang pera ni Dupaya. Nabatid na umaabot sa P29,750,000 at $200,000 ang nakuha ni Dupaya mula kay Cruz.
Bagamat nakapagbigay ito noong August, Sept., Oct. 2017 ng 6% hindi na ito nasundan pa. Pinilit ni Cruz na kausapin si Dupaya subalit hindi na ito nakipag-ugnayan sa kanya. Naniniwala si Cruz na hindi na siya umano mababayaran ni Dupaya lalo pa’t patung-patong na ang pinagkakautangan nito sa Pilipinas at sa Dubai.
Dagdag pa ni Cruz, ang batas na lamang ang magdedesisyon sa kaso at hindi pa rin niya naiisip kung mase-settle ang kaso sa kahit mag-sorry pa ito sa kanya.
- Latest
