Anak ng aktor/ rapper na si Francis M., kalaboso sa panghihipo
MANILA, Philippines — Kalaboso ang anak ng yumaong aktor at master rapper na si Francis Magalona matapos umanong hipuan ang empleyada ng isang bar sa Bonifacio Global City (BGC) Fort Bonifacio kamakalawa sa Taguig City.
Kahapon alas-9:00 ng umaga ay ini-inquest na sa Taguig City Prosecutor’s Office dahil sa kasong Acts of Lasciviousness ang suspect na si Francis Michael “Frank” Magalona.
Ang babae namang biktima ay 30-anyos, nagtratrabaho sa Revel at the Place, na matatagpuan sa BGC.
Ayon report na isinumite ng imbestigador na si P02 Clarissa Mamuag, ng Wo-men’s and Children Protection Desk, Taguig City Police sa kanilang hepe na si Police Sr. Supt. Alexander Santos, base sa pahayag ng biktima, naganap ang insidente alas-3:00 ng madaling araw sa nabanggit na bar.
Kasalukuyan aniyang isi-serve ng biktima ang alak sa table ng grupo ni Magalona nang biglang dakmain ng suspect ang maselang bahagi ng katawan ng biktima.
Paglingon ng biktima ay nakita umano niya ang kamay ng batang Magalona at lumakad itong palayo.
Agad namang isinumbong ng biktima sa kanyang supervisor ang insidente at humingi ng tulong sa mga bouncer, na nagresulta ng pagkakaaresto sa batang Magalona na kung saan agad itong dinala sa nasabing himpilan ng pulisya.
Hindi naman nagbigay ng anumang pahayag si Magalona hinggil sa insidente.
- Latest
