Checkpoint tinakasan, lider ng robbery group utas
MANILA, Philippines — Nasawi ang hinihinalang lider ng isang robbery hold-up group matapos umanong makipagbarilan sa mga pulis na nagsasagawa ng checkpoint sa Caloocan City, kahapon ng madaling araw.
Kinilala lamang ang nasawi sa alyas Epoy na namatay noon din bunga ng tinamong mga tama ng bala ng baril sa katawan. Nauna rito, nakatanggap ng impormasyon ang mga tauhan ng Northern Criminal Investigation and Detection Group (CIDG), National Capital Region (NCR) sa pangunguna ni Chief Insp. Michael John Villanueve na may plano umano ang grupo ni Epoy na mangholdap sa may North Caloocan.
Dahil dito, kaagad nakipag-ugnayan ang CIDG sa Caloocan Police Community Precinct 6 saka nagsagawa ng checkpoint sa kahabaan ng Saranai Village, Brgy. 171, Bagumbong. Dito na namataan ang suspect na lulan sa isang motorsiklo kasama ang isang tauhan ala-1:43 kahapon ng madaling araw.
Sa halip na huminto sa checkpoint, biglang nag-u-turn ang motorsiklo at humarurot para tumakas kaya hinabol ito ng mga pulis, subalit bumaba ang back rider at pinaputukan ang mga operatiba na napilitan namang gumanti ng putok na nagresulta sa pagkamatay ng suspect habang nakatakas ang kasama nito.
- Latest