Pacquiao malaking premyo ang makukuha

MANILA, Philippines — Malaking premyo ang naghihintay kay Manny Pacquiao sa kanyang paghahamon kay Lucas Matthysse sa Hulyo 15 sa Kuala Lumpur, Malaysia.

Sinabi ni longtime adviser Mike Koncz na mas higit pa sa tinanggap ni Pacquiao nang labanan niya sina Tim Bradley, Jessie Vargas at Jeff Horn ang matatanggap ng Filipino boxing superstar sa pagsagupa kay Matthysse.

“Definitely in the last three to four previous fights,” wika ni Koncz sa mga Filipino reporters.

Walang ibinagay na detalye si Koncz, ngunit nakakuha si Pacquiao ng P20 million sa kanyang third fight kay Bradley at $4 million nang makatapat si Vargas noong 2016 at $10 million sa pagharap kay Horn noong 2017.

Ito ang magiging unang laban ni Pacquiao matapos maisuko ang kanyang WBO welterweight crown sa Australian fighter noong Hulyo ng 2017.

Ayon kay Koncz, hindi nila natanggihan ang malaking alok ng Malaysian investors para sa laban kay Matthysse.

“The way it’s structured…,”  sabi ng Canadian advisor.

Sarado rin ang bibig ng kampo ni Matthysse tungkol sa premyo, ngunit sinabi ni Golden Boy Promotions  president Eric Gomez na ito na ang magiging pinakamalaking matatanggap ng Argentinian boxer.

“We won’t discuss. But it’s good. It’s very good,” wika ni Gomez. “He (Matthysse) lives in a dangerous area so we don’t want to talk."

Ayaw ding ibunyag ni Koncz ang investors group na magdadala kay Pacquiao sa Malaysian capital, huling humawak ng malaking boxing event nang lumaban si Muhammad Ali 43 taon na ang nakakalipas.