Ang resipe aron makatulog dayon (2)

Sumpay sa opsyon # 1, ang pagsagol sa tulo ka ingrediyentes nga kutawon ug moinom og usa ka kutsara, dayon patabanan kini sa pag-inom og usa ka basong tubig.

Ang opsyon # 2 – mahimong moinom og ‘raw honey’ ug coco oil (evco) nga dili sagolon, dayon moinom og usa ka basong tubig. Inighuman, isunod ang pag-inom og usa ka baso nga tubig nga kinutawan og asin.

Kon sa kagabhion nakatulog ka na, apan sige og kamatamata gihapon, mahimong moinom pag-usab niini kay dangtan og 30 minutos makatulog ka ra pagbalik. Bisan sa katam-is sa resipe, ang honey maoy responsable nga makatulog kita, nga dili kini makapasaka sa lebel sa ‘bloodsugar.’

Nakadugang kini sa pagpondo og ‘glycogen’ sa atay para sa utok, nga ang kakulang niini, mosaka ang prodaksyon sa adrenal glands’ nga‘stress hormones’(cortisol ug  adrenaline), maoy hinungdan nga dili kita katarong og tulog.

Ang lana sa lubi (coco oil), mao sab ang mopabaskog sa lawas, nga inigmata maghatag og maayong kondisyon nga harohay pamation ang buntag. Ang asin (sea salt) usab maoy motabang sa pagpakalma sa lebel sa ‘stress hormones’, nga maoy naghatag og kusog, o enerhiya sa utok ug sa lawas.

Lain nga resipe aron dali makatulog. Kini mao ang duha ka ingrediyentes, ang gatas ug honey, nga kini gigamit na sukad pa sa pipila na siglo ang nakalabay, nga popular isip natural nga pang-alibyo sa ‘insomnia’ o dili katulog.

Nahibalo na kita nga ang honey, maoy mopakgang sa hormones nga mobalda sa atong pagtulog, ug mao sab ni ang mopagana sa ‘trytophan’ sa utok aron kita mahinanok, nga niini ang ‘serotonin’  himuon nga ‘melatonin’ nga makatabang sa proseso sa maayo nga pagkatulog, aron kita mopiskay inigmata sa kabuntagon.