Dili gustong mopahawa ang nag-abang
Dear Atty. Divine,
Duna ko’y gipaabangan nga apartment sulod na sa duha ka tuig. Mi-expire na ang among contract niadtong Enero ug ako siyang gipahibawo nga dili na nako i-renew ang Contract of Lease kay ako na nga gamiton ang property.
Apan hangtud karon, nagdumili man ang nag-abang sa pag-vacate sa property ug wa na sab siya mobayad sa abang. Unsa man ang angayan nako nga buhaton aron siya mopahawa? Daghang salamat. — Loida
Dear Loida,
Ang una nimo nga buhaton mao ang pagpadala og demand letter ngadto sa nag- abang sa imong property sa pagbayad sa rental nga wa niya kabayri ug sa pag-vacate sa property.
Kon iyang ibaliwala ang imong demand letter, imo siya nga pasakaan og reklamo sa barangay aron kamo magkaatubang.
Kon dili kamo maareglo sa barangay, then mangayo ka og Certificate to File Action ug dayon mopasaka ka og kasong Unlawful Detainer ngadto sa Municipal Trial Court (MTC) sa dapit diin mahimutang ang imong apartment ug ang korte na unya ang momando kaniya sa pagpahawa ug hayan makabayad pa gyud siya og damages tungod sa iyang gibuhat. Thanks and God bless.- Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest