Mga anghel gilamoy sa kalayo

Duha ka bata ang napaig gyud intawon sa nahitabo nga sunog sa barangay Pajo, dakbayan sa Lapu-Lapu niadtong nakalabay’ng Biyernes.

Nagpangedaron og kwatro ug dos anyos ang nakalas nga mga bata kinsa maoy giingong nakaingon sa sunog human nagdula og pusporo nga posibleng misilaob.

Wala kuno maalinggati sa inahan ang gipanghimo sa iyang mga anak kay aduna usab siya’y giatiman, sanglit nanginabuhi siya, kay siya ra man ang nagbuhi sa mga bata isip usa ka single parent.

Nakaani og kasuko sa mga nasunogan ang inahan sa mga bata tungod sa nahitabo nga nakaamong kini sa dili momenos 500 ka pamilya nga nawad-an sa ilang mga kabtangan.

Bisan unsaon nila ang naasoy’ng babaye, dili na gyud mabalik pa ang tanan nga nagusbat gumikan sa panghitabo. Apan may mahimo baya paglikay sa ingon niini nga panghitabo kon magmatngon lang, ilabi na karon nga hilabihan kainit ang panahon.

Nahitabo ang trahedya sa sunog atol nga nag-obserbar kita sa Fire Prevention Month diin gihugtan ang kampanya paglikay sa sunog.

Sagad gyud sa hinungdan sa sunog mao ang problema sa linya, o wiring sa kuryente nga depektoso, nasubrahan nga pag-charge sa gadgets, wala maibot nga appliances ug kining pagdula og pusporo o kandila sa mga bata.

Makugang ra man gud kita sa higayon nga adunay moulbo nga sunog apan kasagaran mura’g i-take for granted ra ang pahimangno sa atong kabomberohan.

Ang reblocking mahisgotan lang ini’g human na sa sunog. Nganong dili na man lang mag-reblocking sa mga dapit nga hagip-ot kaayo samtang wala pa ang katalagman?

Dili lang sa Pajo, kon dili, apil sa tanang mga dapit, kay sukad nagsunod ako sa mga panghitabo sama niini ug wala pa ko kabalita nga dunay nag-reblocking kay nahadlok nga maigo sa sunog.