‘Safe Trip Mo, Sagot Ko program’ inilunsad
MANILA, Philippines — Inilunsad kahapon ng Metro Pacific Tollways ang programang ‘Safe Trip Mo, Sagot Ko’.
Ito ay bunsod ng inaasahang pagdagsa ng publiko mula sa Metro Manila patungo sa mga lalawigan bunsod ng nalalapit na paggunita sa Mahal na Araw.
Ayon sa Metro Pacific Tollways, magbibigay sila ng ayuda sa mga motoristang makakaranas ng aberya sa kanilang biyahe.
Ipapatupad ang programa sa North Luzon Expressway (NLEX), Subic-Clark-Tarlac Expressway (SCTEX) at Cavite Expressway (CAVITEX).
Sa ilalim ng programa, magtatayo ng motorist camps sa SCTEX na matatagpuan sa Floridablanca Rest bay para sa mga motoristang bibiyahe patungong Subic mula Marso 28 hanggang 29.
Sa nasabi ring lugar itatayo ang motorist camps para sa mga Tarlac bound mula Marso 28 hanggang Abril 1.
Ang mga naturang motorist camp ay mayroong Mechanic Service at First Aid Assistance mula alas-6:00 ng umaga hanggang alas-6:00 ng gabi.
Maglalagay din ng information at helpdesks sa mga gasoline stations sa kahabaan ng NLEX at SCTEX, sa mga nabanggit ding petsa.
Ang naturang assistance program ay magkakaloob rin ng 24-hour free towing services para sa mga class 1 vehicles sa panahon ng Semana Santa.
“We are implementing a more extensive SMSK starting this Holy week to further improve our services for safe and convenient travel to our motorists traveling between Metro Manila and Central and North Luzon provinces”, pahayag ni MPTC President at CEO Rodrigo Franco.
Simula sa susunod na linggo ay magsisimula nang mag-uwian ang mga residente ng Metro Manila, na nais gunitain ang Mahal na Araw sa kani-kanilang lalawigan.
Inaasahan namang mula Sabado de Gloria hanggang Linggo ng Muling Pagkabuhay ay muli silang bibiyahe pabalik ng Metro Manila. - Mer Layson
- Latest
