Quiapo blast hindi terror attack – Bato
Itinaon sa ASEAN summit opening...
MANILA, Philippines - It’s not a terror attack!
Ito ang inihayag ni Philippine National Police (PNP) Chief P/Director General Ronald “Bato’ dela Rosa na pinawi ang pangamba na ‘terror attack’ laban sa idinaraos na ika-30th Association of Southeast Asian (ASEAN) Summit ang nangyaring pagpapasabog sa Quezon Boulevard malapit sa Quaipo Church kung saan aabot sa 14-katao ang nasugatan noong Biyernes ng gabi.
Sina dela Rosa, National Capital Region Police Office (NCRPO) Chief P/Director Oscar Albayalde at iba pang opisyal ay personal na nag-inspeksyon sa ‘blast site’ noong Biyernes ng gabi.
Ayon naman kay Albayalde sa kasalukuyan ay gang war ang sinisilip na anggulo sa motibo ng pagpapasabog kung saan sa pinakahuling update kahapon ng umaga ay naitala na sa 14-katao ang nasugatan kabilang ang dalawang malubhang nasugatan.
Nabaitd na anim naman ang nakauwi na matapos na lapatan ng pangunahing lunas habang walo pa ang patuloy na ginagamot kabilang dito ang dalawang nasa seryosong kalagayan.
Ayon kay SPO3 Dennis Insierto ng District Police Intelligence Operations Unit, dalawa ang isinugod sa Philippine General Hospital na sina Ramon Carious, 46, ng Recto Avenue, Quiapo, Maynila; at Rolando Gubat, 45, ng Castillejos, Quiapo, Maynila.
Isa naman ang dinala sa Mary Chiles Hospital na si Pepito Enriquez, 44, ng Obando, Bulacan habang isinugod sa Jose Reyes Memorial Medical Center sina Migine Lopez ng Tanza, Cavite; Mayvelyn Olipas, 19, ng Barangay Tayog, Carriedo, Pangasinan; Alvin Michael Vallila, 20, ng CM Recto Ave., Quiapo, Maynila; Clarissa Macaspac, 24, ng San Pedro Saog, Lubao, Pampanga; Amado Flores, 37, ng Sta. Cruz, Laguna; Patrick Bagnes Y, 26, ng Lopez St., Villas Espanya Subdivision, Araneta Avenue, Quezon City; Reynaldo Cabanilla, 28, ng Bautista, Pangasinan; Ruiz Convicto Jr., 32, ng Ayala Blvd., Ermita, Maynila; at si Wilfredo Tomagan, 22, ng Quezon Blvd., Quiapo, Maynila.
Samantala, si Mariano Genabel ay dinala sa Manila Doctor Hospital.
Bandang alas – 10:50 ng gabi nang sumabog ang improvised pipe bomb sa kahabaan ng Quezon Boulevard sa panulukan ng Soler Street Extension na ikinagulantang ng mga tao.
Sa inisyal na imbestigasyon, pinaniniwalaang ama ng isang binatilyo ang may kagagawan ng pagpapasabog dahil nagbanta ito na pasasabugin niya ang nasabing lugar kapag hindi sumipot ang mag-utol na Kahulugan na gumulpi sa kanyang anak noong Miyerkules (Abril 26).
“The explosion injured 14 persons, it was caused by an improvised pipe bomb. Initially, we gathered that this started w/ the mauling of a minor by 3 individuals. The pipe bomb came as a revenge to the three,” pahayag ni Albayalde.
Sinabi rin ni Albayalde na walang kinalaman sa pagdaraos ng ASEAN Summit sa Philippine International Convention Center (PICC) ang pagpapasabog.
“I assure that the region is safe and secured for our local and international delegates. Security measures are in place,” dagdag pa ni Albayalde.
Sa kasalukuyan, ayon sa mga opisyal ay nirerebisa na ng mga imbestigador ang CCTV camera footage habang patuloy ang masusing imbestigasyon. Dagdag ulat nina Angie dela Cruz at Lordeth Bonilla
- Latest