Paggiba sa Fabella patuloy na tinututulan
MANILA, Philippines - Tiniyak ng mga empleyado ng Fabella Hospital na hindi sila titigil sa panawagan at pagmamakaawa sa mga opisyal ng pamahalaan lalo na kay incoming president Rodrigo Duterte kaugnay ng planong paggiba sa nasabing ospital.
Nabatid na umabot na sa Davao City ang pagmama-kaawa ng ilang empleyado katuwang ang mga civic groups para ipatigil ang planong paggiba sa Dr. Jose Fabella Memorial hospital sa Sta Cruz, Maynila.
Ayon kay Jocelyn Andamo Convenor, Save Fabella Hospital movement nangako si Duterte na aaksyon kapag opisyal na siyang naupo sa Malacañang.
Sa nakarating na tugon sa kanila, sinabi umano ni Duterte na hindi umano niya hahayaang “malusaw’’ ang Fabella.
Hindi naman aniya sila tutol sa modernisasyon. Gayunman, hindi dapat mawala ang libreng serbisyo sa mahihirap at matanggal sa trabaho ang Fabella employees.
Kahapon itinakda ng DOH ang pagbabakante sa ospital subalit hindi umano nila ito sinunod at sa halip ay normal pa rin ang operasyon ng Fabella habang hindi pa tiyak kung kailan ang paggiba sa gusali.
- Latest