Obrero todas sa tandem

MANILA, Philippines – Patuloy pa ring naghahasik ng krimen ang mga kriminal na “riding-in-tandem” makaraang pagbabarilin hanggang sa mapatay ang isang obrero, kamakalawa ng gabi sa Valenzuela City.

Dead on the spot dahil sa maraming tama ng bala ang 25-anyos na biktimang si Jonji Torcal, residente ng No. 2531 M. Delos Reyes Street, Brgy. Gen. T. De Leon, ng naturang lungsod. Inilarawan naman ang isa sa dalawang salarin na nasa 5’4” taas, ka­tamtaman ang katawan, nakasuot ng itim na jacket, at naka-helmet.

Sa ulat ng pulisya, naganap ang pamamaril dakong alas-9:48 ng gabi sa tapat ng bahay ng biktima. Nag­huhugas ng plato ang  biktima malapit sa pinto nang sumulpot ang gunman saka walang sabi-sabing pinagbabaril ang biktima.

Agad na tumakas ang sa­larin sakay ng isang motorsiklo na pinaharurot ng naghihintay na kasamahan nito sa hindi mabatid na direksyon.

Rumesponde naman ang mga tauhan ng Police Community Precinct 2 subalit  bigo nang masakote ang mga sa­larin.

Hinihinalang may kaugnayan sa iligal na droga ang pamamaril sa biktima maka­raang marekober ang isang pouch bag na pag-aari nito na may laman na mga tinuping aluminum foil.

Narekober rin sa lugar ng krimen ang tatlong cartridge at isang bala buhat sa hindi pa mabatid na kalibre ng baril.