Mag-ingat sa pagkalat ng pekeng pera - Isko
MANILA, Philippines – Pinag-iingat ngayon ni Manila Vice Mayor Isko Moreno ang publiko mula sa ibinebentang pekeng pera sa Maynila.
Ang paalala ni Moreno ay kasunod ng pagkaka-aresto sa isang dating Overseas Filipino Worker (OFW) na si Radiya Paglala Datugan, 30, tubong Maguindanao at residente ng 507 Block 1, Dubai, Brgy. 649 sa Baseco Compound, Port Area, Manila, na naaktuhang nagbebenta ng pekeng peso bills, sa Sta. Cruz, Manila noong Biyernes.
Ayon kay Moreno, ngayong panahon naman ng kapaskuhan ang paghahandaan ng publiko, hindi malayong marami ding indibiduwal ang magsamantala.
Payo din ni Moreno, mas makabubuting pag-aralan ng publiko ang pagkilatis sa pera upang hindi maloko.
Bagama’t maraming pulis ang nakakalat sa iba’t ibang lugar sa Maynila, mas makabubuti pa ring mag-ingat ang mga mamimili at dadagsa sa iba’t ibang pampublikong pamilihan.
Nanawagan din si Moreno sa mga may nalalamang nagssagawa ng iligal na operasyon tulad nito na agad na makipag-ugnayan sa pulisya upang agad na madakip at hindi na makapangloko pa ng sinuman.
Nabatid na umaabot sa P4,000 pekeng pera ang nakuha sa pag-iingat ni Datugan na may denomination na P1,000 ; P500 ; 200 at P50.
- Latest
