Produktong nagtataglay ng nakalalasong kemikal bawal na sa Maynila
MANILA, Philippines – Naniniwala si Manila 1st District Councilor Numero Lim na mas dapat na maipasa agad ang ordinansa na naglalayong ipagbawal na ang pagbebenta ng mga produktong nagtataglay ng mga nakalalasong kemikal.
Isinumite ni Lim ang draft ordinance number 7709 na “Prohibiting the sale of unregistered products containing hazardous substances specifically toxic cyperthrine, oxalic acid, toxic lead with territorial jurisdiction of the City of Manila and providing penalties for violation thereof”.
Ayon kay Lim, maliwanag sa advisory ng Food and Drugs Administration (FDA) na ang mga nasabing kemikal ay hindi lumusot sa ‘safety and efficacy assessment” at delikado sa kalusugan ng tao at mga hayop.
Giit ni Lim, isa-isa nang nagsusulputan sa ilang pamilihan ang lantarang bentahan ng mga nakalalasong kemikal partikular sa Divisoria at Quiapo bukod pa sa Baclaran.
Kailangan aniyang bigyan pansin ng city government ang report ng National Poison Management and Control Center na ang mga nabanggit na kemikal ay magdudulot ng sakit ng tiyan, pagsusuka, pagkahilo at pagtatae.
Paliwanag ni Lim, umaasa siyang agad na maipapasa ang ordinansa kung saan mapapatawan ng kaukulang parusa ang mga may-ari ng establisimyento na magbebenta ng mga hazardous substance.
Posibleng makulong ang may-ari ng tindahan kasabay ng pagpapasara ng kanyang establisimyento kung mahuhuling lumalabag sa ordinansa.
- Latest