Pumaslang sa ka-live-in at apo, arestado
MANILA, Philippines - Matapos ang pitong taong pagtatago sa batas, nadakip ng mga operatiba ng PNP-Criminal Investigation and Detection Group (PNP-CIDG) ang isang most wanted na pumatay sa kanyang live-in partner at 6-anyos na apong lalaki sa isinagawang operasyon sa Navotas Fishport, Navotas City kamakalawa ng hapon.
Kinilala ni PNP-CIDG Chief P/Director Benjamin Magalong ang nasakoteng suspect na si Roy Fuentes.
Si Fuentes ay nadakip ng mga awtoridad dakong alas-5:40 ng hapon sa pinagtataguan nito sa nabanggit na lugar.
Inihayag ni Magalong na ang suspect ay inaresto sa bisa ng warrant of arrest sa kasong 2 counts ng murder na inisyu ng Regional Trial Court, Branch 40 sa lungsod ng Maynila noong 2012.
Sa tala ng PNP-CIDG si Fuentes ay sangkot sa pagpatay sa live-in partner nitong si Delia Gajudo at apong si Timothy Gajudo; kapwa brutal na pinagsasaksak ng suspect noong Agosto 2007 sa C.P. Garcia, Moriones, Tondo, Manila.
Base sa record si Fuentes ay humihingi ng pera sa live-in partner nitong si Delia na tumanggi naman itong bigyan dahil sa bisyo ng suspect na nauwi sa mainitang pagtatalo. Sinabi ng anak ni Gajudo na interesado lamang ang suspect sa pera ng kaniyang ina kaya nakipag-live-in dito.
Magugunita na ang kaso ay isinampa lamang noong 2011 matapos na lumutang ang isang kapitbahay ng biktimang si Delia upang tumestigo.
Nasamsam naman mula sa suspect ang isang cal. 38 revolver at anim na bala.
Idinagdag pa ng opisyal na ang suspect ay mahaharap rin sa karagdagang kasong Republic Act 10591 (Comprehensive Law on Firearms and Ammunition).
- Latest
