Pulisya at militante upakan sa harap ng bahay ni PNoy
MANILA, Philippines – ‘Nagkabakbakan’ ang mga pulis at mga miyembro ng militanteng grupo na sumugod sa gate mismo ng ancestral home ni Pangulong Benigno Aquino III sa Times street sa Quezon City kahapon ng umaga.
Apat na ang pulis ang nasugatan at isa rito ang malubha at isinugod sa pinakamalapit na pagamutan. Nabasag ang mukha ni SPO1 Arnold Reyes nang tumama sa kanya ang malaking tipak ng bato na inihagis ng mga militante.
Sinasabing nakapasok sa barikada ng pulisya ang grupo ng militante na aabot sa mahigit 100 katao kabilang na ang mga organisasyon na nasa ilalim ng grupong Mindanao Manilakbbayann 2014.
Galit na galit din ang katabing bahay ng mga Aquino na si Mrs Juanita Sy dahil sa pinagbabato din at pininturahan ng mga katagang kumukundena kay Pangulong Aquino ang harap ng kanilang bahay.
Bitbit na isyu ng mga ito ang anila’y militarisasyon sa Mindanao na dahilan para mapalayas sa kanilang mga tahanan ang mga residente rito. Iginiit nila ang pagbaba ni Aquino sa puwesto.
Ikinatwiran naman ng mga militante na nanakit din sa kanila ang mga pulis kaya sila ay nanlaban sa mga ito.
- Latest
