Ama walang pambayad Bangkay ng anak itinakas sa morgue ng ospital
MANILA, Philippines - Sanhi ng kakapusan sa pera, nagawang itakas ng isang mister ang bangkay ng kanyang dalawang-taong gulang na anak na lalaki mula sa morgue ng isang paÂgamutan sa Malabon City kahapon ng maÂdaling-araw.
Sa report ng Malabon City Police, ala-1:43 ng madaling-araw nang itakas ni Marlon de Leon, 30, ng Brgy. Longos ng naturang lungsod ang bangkay ng anak habang nakalagak sa morgue ng Pagamutan Lungsod ng Malabon (PLM).
Dinala ni Marlon ang kanyang anak sa pagaÂmutan kamakalawa ng gabi dahil sa pagtatae at pagsusuka subalit idineklara na rin itong dead-on-arrival.
Humingi ng tulong sa Malabon City Police ang pamunuan ng PLM hanggang sa matagpuan ng mga nagpapatrulyang mga pulis ng MPD si De Leon na yakap-yakap ang bangkay ng anak sa labas ng gate ng Missionary Church sa Tayuman, Tondo, Manila.
Dinala ang bangkay sa Jose Reyes Memorial Hospital upang pansamantalang ilagak kung saan ipinaalam naman kaagad sa Malabon City Police at sa PLM ang insidente.
Nang puntahan ay nalaman kay De Leon na kaya niya nagawang itakas ang bangkay ay dahil na rin sa kahirapan at lalong lalaki umano ang gastos kapag isinailalim sa awtopsiya kung kaya dinala niya sa religious missionary church upang makahingi ng tulong.
Nabatid na isang politiko naman mula pa sa Maynila ang nakaalam sa pangyayari at inako lahat ang babayaran sa ospital, pagbuburulan at pagpapalibing sa bangkay.
- Latest