Dalaga, sugatan nang barilin ng kaaway ng ka-live-in

MANILA, Philippines - Sugatan ang isang 18-anyos na babae nang pagba­lingang pagbabarilin ng ka­away ng kanyang live-in partner  nang hindi tamaan ng mga ito ang kanilang tunay na target sa Mandaluyong City kahapon ng madaling-araw.

Ginagamot sa Mandaluyong City Medical Center (MCMC) ang biktimang si Maritony Pipit, ng Sinag Baba St., Brgy. Mauway, Mandaluyong City dahil sa tinamong tatlong tama ng bala sa kaliwa at kanang braso at likod.

Isa lamang sa dalawang nakatakas na suspek ang nakilalang si Carlito Parido alyas Tolit, at residente ng Block 1, Lot 1, Sinag St., Brgy. Mauway, Mandaluyong City.

Batay sa ulat nina SPO1 Edmund Fabela at PO3 Marvin Masangkay, dakong ala-1:30 ng madaling-araw nang maganap ang krimen, habang papasok na ang biktima sa kanilang bahay, kasama ang kanyang live-in partner na si Jojo Jory, tri­cycle driver.

Nagulat na lamang ang mag-live-in partner nang biglang sumulpot ang mga suspek at bigla na lang silang pinagbabaril.

Bigo naman ang mga suspek na tamaan si Jojo na hinalang siyang tunay na puntirya matapos na makapagtago kaya’t si Pipit, na naiwan ang binalingan at pinagbabaril ng mga ito.

Ayon sa biktima, narinig pa niya si Parido nang sabihin nito sa kasamahan na barilin na siya sa ulo.

Mabuti na lamang umano at hindi sumunod ang inutusan at iniwanan na lamang ang duguang biktima.

Hindi pa naman batid ang motibo sa krimen dahil hindi pa umano nagbibigay ng salaysay sa pulisya si Jojo, na tulala pa dahil sa insidente.