Dugang LGUs nisuspenso sa ilang mga klase tungod ni Betty

CEBU, Philippines — Dugang mga lokal nga kagamhanan ang nisuspenso sa klase kagahapong adlawa tungod sa hulga sa panahon dala sa super typhoon Betty nga dunay international name nga Mawar.

Ang mga lungsod sa Daanbantayan, San Remigio, Tabogon, Sogod, Alcoy ug Sibonga ang nianunsyo sa pagkanselar sa klase sa tanang levels kagahapon.

Ang lungsod sa San Remigio, si Mayor Alfonso Pestolante misuspenso pud sa trabaho sa mga opisina sa munisipyo gawas sa mga frontline offices sama sa Disaster Risk Reduction and Management Office (MDRRMO) ug sa Municipal Social Welfare and Development Office.

Duna hinuoy skeletal work force nga magpabilin  MHO ug sa buhatan sa mayor.

Bisan og dili direktang makaapekto sa Sugbo ang bagyong Mawar, ang mga LGUs padayon ang pagmonitor ug pagpangandam sa ilang tagsa tagsa ka mga lugar.

Sa Dakbayan sa Danao, ang local DRRM padayon ang pag monitor sa mga sapa ug matod pa nagpabilin nga kalma ug mubo ra ang tubig

Pag-abot sa pagsuspenso sa klase sunod semana sumala sa LGU discretion kini sa mga school heads kay “ ang dagan sa panahon isolated man.”

Didto sa lungsod sa Minglanilla, giandam na daan ang mga tulda kon asa moestar ang mga residente nga mapabakwit.

Sa lungsod sa Sta. Fe giandam na pud kini sa mga evacuation centers matag barangay kon asa mamahimong makabakwit ang mga residente kun ugaling adunay emerhensiya.

Ang ubang LGUs tagsa tagsa og hatag og advisory sa mga residente niini pinaagi sa ilang tagsa tagsa ka social media pages.

Si Mayor Gerald Anthony “Samsam” Gullas sa Talisay City miingon nga

walay klase ang tanang pampublikong tunghaan sa elementarya ug sekondarya.

Ang mga basketball gym o covered court sa matag barangay ang gihimo nga primary evacuation area unya ang mga tunghaan ang gihimo nga secondary evacuation area.

Ayaw paghugaw-hugaw

Gumikan niini daghan sa mga magtutudlo ang niputos og plastik sa ilang mga bong-bong ug gipangsulod og plastik box ang mga importanteng dokumento.

Usa na si Methy Saycon Barliso ug nakita ang iyang Facebook post sa nga matag lugar sa iyang lawak saringan adunay pahimangno nga unta ang mag okupar sa iyang classroom makamao moatiman sa ilang mga butang.

Natagam sila sa miaging katalagman diin human nanguli ang mga evacuees sa ilang tagsa ka panimay nagbilin sila og kahugaw ingon man nangawagtang ang pipila ka mga kagamitan sa ilang lawak. Si Barliso nanghinaot nga atimanon sa mga evacuees ang lugar nga ilang gi estaran ug dili yamayamaan. -  Gabriel Bonjoc, IBM (BANATNEWS)