Konsehal Digul Gullas gioperahan human na-injury sa basketball
CEBU, Philippines — Mihangyo si Mayor Gerald Anthony “Samsam” Gullas sa mga Talisaynon nga iampo nga magmalampuson ang operasyon sa iyang igsuon nga si Konsehal Eduardo “Digul” Gullas III.
Si Gullas nipahibawo nga si Digul niduwa og basketball niadtong Miyerkules aron sa pagpasingot. Apan sa iyang pagduwa nagisi ang iyang tuo nga Achilles Tendon.
Ang iyang injury susama kini sa mga injuries nga maangkon sa mga basketbolista bisan ang mga sikat nga basketball players sa tibuok kalibutan sama nila ni Kobe Bryant ug Kevin Durant nakasuway niini.
Asoy pa sa mayor nga ikaduha na kini nga higayon nga naangol iyang manghod tungod sa basketbol ug pareho sab nga parte sa iyang tiil ang naapektahan.
Niadtong tuig 2010 naoperahan si Digul sa iyang wala nga tiil sa Achilles Tendon gihapon, kini mao ang tikod sa tiil nga kun dili maayong pagkaplastar posibleng magisi o magupok.
Sa Facebook post ni Gullas nakita si Digul nga naglingkod na sa wheelchair samtang sila nangaon uban sa ilang pamilya.
“But rest assured even in a cast, in crutches or in a wheelchair, padayon ang panerbisyo ni Digul sa atong mga pinalanggang Talisaynon kuyog ni VM Choy Aznar ug sa atong tanan mga konsehales,” tipik sa post ni Gullas. (BANAT NEWS)
- Latest
