Basura, pagsumpay sa kanal maoy solusyon sa baha — Cortes

CEBU Philippines - Disiplina sa katawhan pinaagi sa tukmang paglabay sa mga basura ug ang pagsumpay sa mga dagkong kanal  maoy nakitang solusyon ni Mayor Jonas Cortes sa probema sa baha sa Siyudad sa Mandaue. Si Cortes miingon nga gikinahanglan gayod ang ensaktong paglabay sa mga basura tungod kay daghang  kanal nga nabara tungod niini.

Si Cortes miingon nga sa pagkakaron gitutokan na ang pagsumpay sa mga kanal sa dakbayan apan gipaagi kini sa phase by phase.

Nanawagan ang mayor sa mga Mandauehanon nga magpakabana bisan nalang sa pagsunod sa mga lagda sama sa hustong paglabay sa mga basura. Matud pa ni Cortes adunay mga kanal nga barado na karon ug moawas ang tubig kun magbunok ang uwan tungod aning mga basurang bisag asa lang gilabay sa mga tawo, sagad niini mga plastik nga dili malata.

Gawas sa pagsumpay sa mga dagkong kanal nga giisip nga maong malungtarong solusyon sa problema sa baha, gipaspasan na sab nila ang paghabwa sa mga basura gikan aning mga baradong kanal. (CEBU NEWS)