Ayaw pugsa

Dear Tito Miguel,

Maayong adlaw! Ako diay si Karl James,  taga Barangay Guadalupe, Cebu City. Akong problema karon kay akong ginikanan ba kay dili makadawat sa akong girlfriend nga single mom. Bisan unsaon nako sila og explain, dili gyud nila dawaton akong uyab.  Duna bayay nindot nga trabaho ang akong girlfriend. Unsa man akong buhaton, Tito Miguel?  —Karl James

Karl James,

Ayaw pugsa. Dili kinahanglan dawaton nila imong uyab aron mo magmalipayon. Ang importante kamo duha, unsay naa ninyo karon ug mga plano sa kaugmaon.

Lagmit ilang rason kinaraan pa, nga imoral ang mamabdosan nga dili kasado. Karon lahi na, hasta ang balaod nagprotektar sa mga single moms. Balikon ko, ayaw pugsa. Ayaw na hisgoti, gibuhat na nimo ang tanan aron makasabot sila. Dili gyud mosulod sa utok nga sirado. Gani, nag-una ra ilang hunahuna, uyab pa mo, dunay purohan dili mo magdayon.

Apan kun sigurado na mo sa usa’g-usa, makita ra na sa tanan, labi na sa imong ginikanan, nga kamo ang para sa usa’g-usa. Pero sa karon, ngadto lang sa mo sa kalibotan nga kamo ra o kuyog sa mga tawo nga nakasabot ug nakadawat ninyo. Ayaw siya isuksok sa imong pamilya, mahisugamak lang mo sa tensyon. Dili kinahanglan ug dili makatabang karon. Kun magdugay mo, duna gyud mahitabo nga sukdon inyong gugma sa usa’g-usa. Pananglit masakit ka, diha nila makita nga tiunay imong uyab kun siya mounong ug moatiman kanimo.

Apan dili pasabot dawaton dayon siya, maniid ra na imong ginikanan, magpaabot nga masayop siya o dunay makita nga kakuwangan, aron ma’s molig-on ilang katarungan nga angay nimo siya buhian. Mao na nga ayaw pugsa. Ang wala’y gusto, way makita nga insakto maski imong uyab maski magsirko-sirko. Tagamtama ang unsay naa ninyo karon. Kun siya dawaton, panahon ray makatubag. Bahala’g dili dawaton, basta kamo duha magmalipayon.   Tito Miguel

Magpatambag ka? Ipada kang Tito Miguel: 0998-581-5856