Kalimti ang nahitabo

Dear Tito Miguel,

 Ako diay si Amelia, naa koy friend nga nanginsulto nako. Dili na nako idetalye pa ang pagpakaulaw niya nako atubangan sa ubang tawo. Taud-taod na nga wala na nako siya tinggi. Wala man sad siya nag-sorry nako maong dili ko ganahan nga ako ang mopaubos. Sakto rani akong gibuhat Tito Miguel? —Amelia

Amelia,

Sakto kaayo. Sa panahon karon nga dagha’y nakahasol sa atong panghunahuna, ma’s maayo molikay sa mga tawo nga toxic kaayo. Di ka angay anugnan nga nawala siya, dili nimo siya higala. Wala’y amiga nga manginsulto’g magpakauwaw nimo sa publiko. Mahimo gihapon nimo siya pasayluon ilawom sa imong dughan ug hunahuna aron ka hingpit maka move on. Dili kinahanglan mag-istorya mo aron imo siya mapasaylo. Gani, wala siya mangayo niini. Aron ka magmalinawon, kalimti na ang nahitabo. Ayaw iluom kay ikaw ray nimugna sa imong dag-om. Tinuod, ikaw ang agrabyado, apan siya ang angay makunsensiya, dili ikaw.

Gani, siya ang angay mauwaw sa iyang gibuhat kay nagpaila siya sa iyang ngil-ad nga batasan atubangan sa ubang tawo. Angay ka magpasalamat sa nahitabo, ikaw nakaamgo nga siya dili higala nimo. Dili ka angay magpaubos, siya mismo nibira nimo paubos sa diha’ng iya ka giinsulto sa atubangan sa ubang tawo.

Kun dili siya mangayo’g pasaylo, pasagdi. Timan-i, siya ang sad-an, ngano ikaw may magpas-an? Ipadayon inyo pagbungol. Wala’y nawala kanimo. Ayaw kawili sa tawo nga hiwi’g mga pamaagi. Imong mental health ampingi, ang mga ngil-ad nga tawo likayi. Tito Miguel

Magpatambag ka? Ipada kang Tito Miguel: 0998-581-5856