Importante malipayon ka

Dear Tito Miguel,

Ako si Grace, single ko ron. Tulo na ang nahimo nako nga mga boyfriend kaniadto . Akong problema ron kay ma-attract naman ko og girl ron uy. Dili na nako feel ang mga lalaki. Maulaw man ko moangkon sa akong friends uy nga usa nako ron ka lesbian. Tabangi ko,Tito Miguel. —Grace

Grace,

Ang moangkon, sad-an. Dili sala ang imong naamgohan karon. Magpaila tingali, maoy insakto nga tawag niini. Mao gyud unta  nay  labing maayo, ayaw itago imong gusto kay wala kay angay ikaulaw. Labaw sa tanan, dili ka makaikyas sa imong tinuod nga pagkatawo.

Labi na sa panahon karon, nga abli na ug andam ang kalibotan sa tanang gender. Kun kaniadto imong pagkatawo bawal, karon angay na ipasigarbo’g iselebrar. Ang bawal karon ang dili kaantigo magmahal.

Kun dili ka kumportable makahibawo sila, ayaw pugsa. Wala kay obligasyon isulti nila unsa ka. Dili nimo utang kanila unsay nagpahipi sa imong hitsura’g lihok. Gani, wala man ka nisulti nila nga babaye ka sa una, nakita lang nila nga naka-uyab ka’g lalaki katulo kaniadto. Busa para nila babaye ka.

Karon nga babaye na imong gusto, dili nimo mistil isulti nga lesbyana ka. Pasagdi sila unsay makita nila. Samtang hilom ka, paminawa imong kaugalingon, basin lalaki na sab imo gusto puhon. O di wa na kay angay isulti. Apan kun naa na kay babaye nga karelasyon, angay na ka mobarug sa imong pagkatawo. Kun di gihapon ka kasulti, sila mismo makaamgo unsa imong pagkatawo. Mahibulong sila, dili na imo problema.

Kun mangutana, niabot na ang takna nga magpaila ka. Apan kun dili nimo kaya ipamulong, ingna sila dili isyu kun unsa ka ang importante malipayon ka. Kun unsa ila makita, mao sab ilang makuha. Tabla ra nga nagpaila ka, wala na nimo gitago unsa ka. Tito Miguel

Magpatambag ka? Ipada kang Tito Miguel: 0998-581-5856