Biya kun...

Dear Tito Miguel.

Dugay na kay ko ganahan magpatambag nimo pero karon ra gyud ko nakalugar. Ako diay si Charisse. Naa nami usa ka anak sa akong uyab nga si Bryle. Saputon ko sa akong uyab kay sige lang uban sa iyang barkada ug magsige og tagay. Dili man siya papugong Tito Miguel, lami na kaayo i-give up kay dili nako happy sa among relasyon.Maglisod lang ko og biya niya tungod sa among anak. Salamat daan, Tito. —Charrise

Charrise,

Lisod ug luoy ang bata, apan dili siya angay himuon nga rason aron magpabilin sa relasyon,  uyab man o magtiayon. Balik gihapon sa batakang hinungdan ngano ang duha ka tawo mosulod ug magpabilin sa relasyon, wala’y lain kun dili ang gugma ug respeto. Kun wala na kay gibati nga gugma para niya, o respeto tungod sa iyang bisyo, biya na sa di pa ka makalaboso. Nagdilaab ang pula nga bandila. Dili papugong sa tagay, sa barkada sige pahayahay. Buot pasabot dili pa siya tantong hamtong nga mobalanse sa barkada ug pamilya.

Kun wala na kay gibati sa imong dughan, kaniya wala kay angay kawilihan. Masabtan nga hadlok ka modako imong bata nga walay amahan, dili tuod mo buwag apan wala iyang amahan sa kiliran, tua sa barkada. Mas kuyaw kun ang bata magtuo nga ang bisyo normal lamang. Mahimo ninyo bahinon ang kustodiya aron iyang amahan makita gihapon niya.

Apan kun duna pay nahabilin nga pagmahal, hangyoa iyang oras sa barkada’g bisyo ibanan. Dili kinahanglan putlon dayon, igo ra kuhaan gamay ug sa hinay-hinay. Tugoti nga kada Sabado puwede, apan sa ubang adlaw dili na. Dili lamang para ninyo nga iyang pamilya, alang usab kaniya, labi na sa iyang kahimsog ug panginabuhi. Gasto ang bisyo, wala pa gyud benepisyo. Kun di gihapon mopatuo, naa ra nimo’g moantos ka’g molaom nga siya magbag-o. Tingali imong gusto kamo magdayon. Pangutan-a imong kaugalingon. Kaya ba nimo agwantahon iyang bisyo nga kaluha na sa iyang pagkatawo? —Tito Miguel

Magpatambag ka? Ipada kang Tito Miguel: 0998-581-5856