Klaroha inyong pagbati

Dear Tito Miguel,

Kasado mi sa akong asawa. Gagmay pa among mga anak. Few months ago, nadunggan nako akong asawa nga nisulti ngadto sa iyang bestfriend nga naa siya'y kabit. Wala nako siya gi-confront kay guilty man pud ko, pero with men. Dili ko bayot, tripper lang.  Karon, bugnaw na og tinagdan akong asawa. Tua na siya sa among condo unit nag-istar kay ganahan kuno siya'g space. Weekends na lang mopauli sa amoa. Unsa man akong angay buhaton? Dili ko ganahan magbuwag mi. —Tripper

Tripper,

Gimahal pa ba ninyo ang usa’g-usa? Kun dili na, wala nay rason magpadayon pa. Dili igong rason ang mga bata, maski gagmay pa sila. Sila gihapon ang maalaot kun kamo magpadayon sa pagpanlingla ug pagbudhi. Tabla ra nga inyong giilad inyong mga anak nga tibuok pa inyong pamilya, apan sa tinuod buak na. Mahimo man mo magbahin sa panahon sa kustodiya aron sila dili malayo ninyong duha.

Kun nagpabilin pa ang pagbati apan dili mo matagbaw sa usa’g-usa, dili kana gugma apan kahakog. Unsa kahay bation sa inyong mga anak kun makahibawo nga duna moy pinahipi nga binuhatan kanila? Lagmit magtuo sila nga mao nay husto. Ini’g dako nila mao sab ilang buhaton sa ilang mga bana ug asawa.

Kun di ka ganahan magbuwag mo, siguroha nga gihigugma pa ninyo ang usa’g- usa. Kun ang gugma nahanaw na, ang haligi sa inyong kaminyuon nahugno na. Kun duna pay gamay nga pagbati nga nahabilin, kumpisal sa imong binuhatan kaniya, agniha siya nga mokumpisal sa iyaha. Kun kaya ninyo pasayloon ang usa’g-usa ug mohunong sa inyong krimen, tingali mahimo pa. Apan kun dili mo kaako mag-usab, labing maayo kamo magbuwag.

Labaw sa tanan, siguroha nga malipayon pa mo sa usa’g-usa. Kay kun dili na, dawata nga kamo napakyas, sa usa’g-usa angay na molingkawas. Kana iyang giingon nga espasyo, buot pasabot duna na siya’y laing palasyo, ang inyong condo, lagmit kuyog niya laing tawo.  —Tito Miguel

Magpatambag ka? Ipada kang Tito Miguel: 0998-581-5856