Hangyoa, ayaw pugsa

Dear Tito Miguel,

Ako diay si Kiara, taga Labangon Cebu City. Akong problema ron kay ang akong boyfriend kay dunay best friend nga babaye. Sa tinuod lang, magselos gyud ko nila, pero kahibawo ko nga walay malisya ang ilang pagka-close. Pero ambot uy, magselos gyud ko. Unsa man ako buhaton Tito Miguel para naa koy peace of mind? —Kiara

Kiara,

Kun sigurado ka wala’y malisya apan magselos gihapon ka, lagmit tungod sa panahon nga nawala ninyo kay tua ngadto sa iyang best friend. Istoryaha imong uyab, ipasalig nga wa kay problema sa ilang kasuod apan hangyoa nga ibanan gamay iyang oras didto. Walay katarungan nga imong ipahunong ilang panaghigala. Apan sa oras makahangyo ka, ikaw man ang uyab, dili ang best friend. Hangyo, ayaw pamugos, kay kun imong uyab kinahanglan pugson sa iyang oras kanimo, duna nay nagpahipi nga lain nga problema.

O dili ba kaha sa tinuod ang imong selos kay kahadlok sa unsay isulti sa uban, nga magduda nga duha mo sa iyang kinabuhi. Himoa kini nga katarungan sa imong hangyo nga ilang oras ibanan, kay basin lahi na ang panan-aw sa uban. Kun husto pa sab unta iyang best friend, siya maikog ug modistansiya gamay. Apan wala siya’y tulubagon kanimo, kun dili ang imong uyab mismo.

Busa siya ang istoryaha, sultihi sa imong gibati, apan naa ra niya unsa iyang buhaton. Ayaw but-i iyang lakang, mao nay sipyat sa kasagaran. Iyaha nang mga tiil, ayaw’g bangil. Ayaw’g salig nga dapat kahibawo na siya kay uyab gud mo. Dili siya mananag-an. Mahimo sad nimo suwayan mo-jam nila duha, panid-i unsay naa sa iyang best friend. Basin lingaw ug siaw kini, itandi sa imong kaugalingon, kay basin dunay wala nimo nga nakita sa imong uyab ngadto. Mas nindot man gud sa manag-uyab managhigala sab, aron wa na silay pangitaon sa usa’g-usa.  Tito Miguel

Magpatambag ka? Ipada kang Tito Miguel: 0998-581-5856