Pangita’g lain kapuy-an…

Dear Tito Miguel,

Usa ko ka lesbian. I'm Ken, 40 years old. Naa ko'y kaipon nga byuda. Mag-away mi usahay kay iyang minor pa nga anak, manganakay, dia namo magsalig. Labanan man pud sa akong partner. Hasta ang kapuyo sa manganakay dia magsalig namo. Makaingon ko usahay, maypa molayas na lang ko. Kapoy. —Ken

Ken,

Kapoy gyud, moguot inyong panimalay kun dunay lain moipon. Kun ikaw ra ang nagsagubang sa inyong gastohanan, ikaw ang angay matuman. Apan kun kamo duha nagtrabaho, klaroha asa ra taman ang kantidad nga imong matunol. Kinahanglan para ra ninyo duha, kay ang sa iyang anak dili na nimo problema. Apan lagmit kuwangan pirmi kay duna lagi laing nagpabuhi. Busa di malikayan moabono gihapon ka. Mapapas gihapon ang linya sa utlanan sa imong pagtabang.

Samok, pero masabtan nga labanan sa imong kapuyo iyang anak. Di malalis ang gugma sa inahan. Maski nasayop o nilapas na iyang anak, iya gihapon kini panalipdan. Busa sa maong hisgotanan, dakong purohan wala kay dag-anan.

Gawas pa, menor de edad pa iyang anak. Lisod pasagdan kay wa pa sa insaktong kabuot. Apan makalagot kay nganong ang tiyan niburot. Kun nahigugma gyud ka sa imong kaipon, tingali angay nimo sila sabton ug dawaton. Apan sa temporaryo lamang, dapat dunay petsa nga imong laoman. Tugoti nga moipon usa samtang wala pa sila’y katakus. Basin ilang umaabot nga anak maghatod ninyo’g lingaw ug kasadya.

Kun kapoyan ug samokan ka, lakaw usa palayo, gawas, paglingaw kuyog imong mga higala. O dili ba kaha bakasyon usa balik sa imong pamilya aron makalingkawas ka kadiyot sa kasamok ug kabug-at. Kun di na gyud ka kaagwanta ug sa imong tan-aw padayon sila mangipon ninyo, pag-inusara, lakaw ug pangita’g laing kapuy-an. Mahimo man mopadayon sa inyong relasyon maski dili mag-ipon. Kaysa mag-ipon nga way kahilom. Tito Miguel

Magpatambag ka? Ipada kang Tito Miguel: 0998-581-5856