Dili na siya interesado
Dear Tito Miguel,
Ako ako diay si King, akong problema ron kay akong girlfriend nga si Michelle kay wala may time nako. Permi nalang trabaho ang iyang giatiman. Kun moreklamo ko, iyaha sad ko buwagan. Unsa akong buhaton para makapahungaw ko niya nga wala nako kauyon sa among sitwasyon? Salamat — King
King,
Ayaw na’g pahungaw, kahanaw. Dili na siya interesado nimo, lagmit nausab na iyang plano. Kay kun gihigugma pa ka niya, mangita siya’g paagi magkita mo maski unsa siya ka busy sa trabaho. Ang kapait kay dili ka puwede moreklamo, hulgaon pa ka nga magbuwag mo.
Nahadlok pa ka? Dili na siya angay manghulga nga buwagan ka, dugay na siya nibuwag nimo, wa lang gipamulong apan sa lanog gilitok sa iyang mga lihok. Laliman ka’g dili mo buwag pero dili mo puede magkita? Tabla ra na nga dugay na mo nabungkag.
Kun kalit lang ka mahanaw, diha nimo makita kun mahibulong ba ug pangitaon ka. Kun mora la’g kaniya wa’y nawala’g nahitabo, buot pasabot dugay na siya nagpaabot nga ikaw mismo makasabot. Sakit, apan angay nimo dawaton nga niabot na mo sa utlanan. Pasagdi ang panahon maoy makapalimot nimo, ablihi ang pultahan sa lain nga dunay panahon para kanimo.
Kun pangitaon ka, diha na pahungaw sa imong gibati. Habwaa ang tanan nimong gikumkom. Klaroha asa na mong duha, o kun ikaw nag-inusara na lang ba. Sa maong paagi siya na mismo ang nimugna’g higayon nga ikaw makapahungaw. Sulbad imong problema kun unsao’g pabuhagay sa imong kalaay. Apan andama imong kaugalingon, lagmit diha na matataw nga inyong relasyon dugay na’ng nahanaw. —Tito Miguel
Magpatambag ka? Ipada kang Tito Miguel: 0998-581-5856
- Latest