Konsulta’g espeyalista!

Dear Tito Miguel,

Almost nine years na amu relationship sa akong partner. Wala gihapun mi baby.Nagpacheck- up na ako pares sa doctor, Tito Migz, ok raman daw iya matres--wala daw problema sa iya. Sa ako nga side siguro naay problem but wla paku nagpa check up.Hadlok ko Tito basin ako maoy naay dipirensya. Basin dili nako madawat sakitan lang ko.Nya gnahan nako magka baby mi kay nana mi sa 30 kapin.I hope imu mi advisan, Tito Miguel..Thank you..Take care always. —J

Bella,

Di ka matabangan kun dili ka mokooperar. Konsulta’g espesyalista, ang bugtong makatubag sa imo’ng pangutana. Posible naa nimo ang problema, posible sab wala, amuma ug timing ra ang gipangita. Dili moatras inyo’ng panuigon, kun dili nimo lihokon karon, mabiyaan ka sa higayon, inig katiguwang nimo igo na lang ka mangutana unsa kaha kun imo lang gisuwayan? Di gyud nimo mahibaw-an kun dili ka mosumite sa eksperto. Daghan ang nawad-a’g paglaom apan tungod sa medisina niabot ang dugay na nila nga gihandom. Pahimusli ang siyensiya kay ang imo’ng sitwasyon mao na’y gipunting ug gipangandaman nila. Ayaw intawon duol sa binisaya o albularyo ba kaha. Masabtan imo’ng kahadlok makahibawo nga ikaw ang duna’y diperesenya. Lagmit nahigot ka sa pagtuo nga ang pagpamabdos maoy sukod sa pagkalalaki. Biyai na ang maong mentalidad, gawas nga kinaraan, dako kini nga kasaypanan.  Ang pagkalalaki o pagkatawo mismo masukod sa kaisog pag-atubang sa kamatuoran. Kun pananglit baog gyud ka, sakit apan kinahanglan dawaton, kay dili kini kawad-on. Buot pasabot duna ka’y mas mahinungdanon nga papel sa kalibotan. Unsa man, paminawa imo’ng dughan, basin apil ang pagpadako ug pag-amuma sa bata nga dili kamo ang ginikanan.

Adoption, wala sa dugo, kun dili nagtubod sa kasingkasing. Ayaw kahadlok unsa’y isulti sa uban, wala sila’y labot sa imo’ng giagihan. Paniid sa uba’ng magtiayon nga nisagop, di ba sa gugma sa bata sila gihigop, makigpatay kun kanila bawion. Apan sa eksperto unaha ang pagdangop, sa dili pa mo mosagop.  —Tito Miguel

Magpatambag ka? Ipada kang Tito Miguel: 0998-581-5856