Wala bayri sa amo

Dear Tito Miguel,

Tagoa lang ko og Mr. Lonely, wala nay trabaho. Bahin ni sa 15 days nga pundo sa akong sweldo sa usa ka security agency nga ako gitrabahoan sa una may mga 2 years na ang nakalabay. Hangtod karon wala pa nako makuha. Dili na nila ihatag kay matud pa sa taga agency dugay na kuno gikuha nga sayod ang Ginoo, Tito, wala manko magkobra.  —Mr. Lonely

Mr. Lonely,

Lagmit wa pa ka mabayri kay kun nabayran pa, ila unta gipakita imong pirmado nga dokumento pagmatuod nga nadawat nimo ang labing uwahi nga suweldo. Busa angay nimo sila paninglan.  Pagdali, kay sa akong nahibaw-an, kun ang kumpanya walay katarungan pagdumili nga ikaw bayran, kinahanglan isang-at nimo ang reklamo ngadto sa labor arbiter sulod sa tulo ka tuig gikan sa adlaw nga angay unta gitunol kanimo isip suweldo.  Kay inig lapas sa tulo ka tuig wa ka’y gibuhat pagkubra sa imong hinagoan, ang tulobagon sa kumpanya mapapas, kay sa panahon nga taas, imo gikatulgan imong katungod ubos sa balaod. Kay kini legal man nga hisgotanan, mas maayo mokonsulta ka’g abugado sa public attorney’s office o dili ba kaha dangop sa labor department kay basin nasayop ko. Andama ug dalha tanang dokumento pagmatuod nga ikaw empleyado ug adunay katungod sa suweldo.

Kun panaglit sa balaod wala na kay katungod, busa sila dunay katarungan mobalibad pagtunol sa kantidad, dawata ang hagit nga makita ra nimo ang ilang gihikaw sa laing pamaagi ug dili gikan sa security agency. Panahon na aron imong usbon imong sitwasyon. Kun sa pangempleyo wala ka moasenso, suwayi ang negosyo, bahala’g ginagmay basta kanunay. Maski na o labi na’g mabayran ka. Gamita imong nadawat para capital. Timan-i, kun unsa ka karon, resulta na sa imong gibuhat sa nilabay nga panahon. Kun duna kay usbon sa imong sitwasyon, suwayi’g simang sa imong naandan kay basin ang suwerte sa laing dalan nimo masugatan. —Tito Miguel

Magpatambag ka? Ipada kang Tito Miguel: 0998-581-5856