Himantayo'ng silingan

Dear Tito Miguel,

Maglagut jud ko sa among mga silingan puyra sa uban. Kusog kaayong manutok--tutukan jud ka sa tanan nimong lihok hangtud mahuman o ang imong ulo hangtud tiil. Himantayon kaayo.

Gusto nalang jud ko moingon sa akong mga parents nga mamalhin og puyo.Unsa may pasabot sa ing-aning batasan ? Ug unsaon mani nako sila, Tito Miguel? Maglagut man gud ko, di ko gusto tutukan. – LEN 

* * *

Len,

Wala ka’y angay buhaton. Inay nga maglagot, ikapasigarbo nga ikaw ila’ng gitutokan. Buot pasabot imo’ng hitsura nindot. Kay di baya ta ganahan motan-aw’g maot. Karon kun di ka mahimutang, unsa kaha’g mopahiyom ka dayo’g timbaya sa motutok, himoa nga higayon nga kanila ikaw makighigala. Inig timbaya nimo, lagmit sila ang dili makumportable. Kun motimbaya’g balik, duna na mo’y connect. Ang pagtutok mailisa’g mga pulong nga kanimo di na makapahibulong.

Timan-i, ang mga silingan baya maoy una madangpan panahon sa emergency. Busa ang maayong relasyon kanila importante. Dili kay aron imo sila’ng gamiton, mao gyud na sakto’ng buhaton. Kun dili motimbaya nimo’g balik, lagmit nikaging. Sila na ang nahimutang sa depensiba, ikaw na ang opensiba apan gipaagi nimo’g diplomasya.

Lahi na pud nga istorya kun ang pagtutok nagdala’g hulga o dili ba kaha pagbiay-biay kay mahimo na ka moreklamo sa barangay. Unjust vexation ang tawag niini sa balaod. Apan samtang ang pagtutok di pa moabot sa pagtuok, usba ang butang nga imo’ng kontrolado, wala’y lain kun dili ang imo’ng reaksyon ngadto nila. Kun duna mo’y katakos mobalhin, mahimo man. Apan unsa’y garantiya nga wa’y motutok nimo sa lain? Maski asa nga dapit, duna gyud mga tawo nga kanimo mopiit. Mora baya ka’g magnet. Mas lain kun mora ra ka’g hangin, nilabay nibalik wa’y nakapansin. – Tito Miguel