Utlanan sa Pagtabang

Dear Tito Miguel,

Good day! My friend passed away. Daghan siyag responsibilidad nga nabiyaan busa nagtinabangay mi sa uban namong friends. Maghatagan ko’g allowance sa iyang family every now and then.

Karon nag-abusar man iyang igsuon. Nagsalig na. Muhunong nako’g tabang pero maluoy man pud ko. Unsay angayan nakong buhaton?

Jayce

* * *

Jayce,

Ang tabang duna’y utlanan. Kay kun dili matuldokan, mahiagom ka sa serbisyo ug sakripisyo nga wa’y kataposan.

Mahimo na ka moundang pag abag, labi na imo’ng gitabangan nayabag. Tinuod luoy sila apan hangtod kanus-a man ka magpaulipon sa imo’ng kaluoy?

Kinahanglan sila motabang ug mobarug para sa ila’ng kaugalingon. Tingali mas maayo nga kamo nga nitabang magsabot nga hatagan ninyo sila’g bulto nga tabang pinansiyal, iklaro nga aron ila’ng gamiton nga kapital sa negosyo ug panginabuhian. Lagmit dili nila gamiton sa negosyo, mahanaw lang dayon. Ilaha na nga problema, basta kamo nihatag nila’g higayon ilaha’ng kahimtang usbon.

Karon kun ila’ng kahimtang mao ra gihapon, mahimo ka motabang apan sa mga higayon lamang nga hingpit ang panginahanlan, kun ang nakataya kinabuhi na, sama sa sakit ug disgrasya nga sila na ospital na.

Apan ang adlaw adlaw nga panginahanglan, apil ang pangeskuyla ug uban pa, undangi na kay duna sad kay kaugalingon nga pamilya, minyo man ka o dalaga. Gawas kun imo’ng kuwarta nisubwak ug gipamunit ra, apan kini imo’ng gihagoan ug sa singot gipatuloan.

Gani, mismo imo’ng nitaliwan nga amiga maikog kun siya buhi pa ug maoy unang mopakgang sa iya’ng igsuon nga niabusar. Busa wala kay angay kabalak-an sa paghunong. Imo’ng amiga sigurado na nga mapasalamaton. Maayo man ang motabang, apan kun kini masobrahan, ang imo’ng kabuotan mahimo’ng katangahan.

Tito Miguel