Kabit ni Mama

Dear Tito Miguel,

Maayong adlaw! Tawga lang ko og Tin, 17 years old, taga Mandaue. Akong papa, abroad. Akong mama maoy kauban namo sa akong younger sister.

Recently, nahibaw-an namo nga naa diay kabit among mama. Among giconfront, wala sab siya nideny. Pero gi warn mi niya nga dili mutug-an sa among papa aron dili mi mahimong broken family. Kaluoy sab sa among papa. Unsay angayan namong buhaton?

Tin

* * *

Tin,

Maayoha moduwa sa inyong inahan, inay nga kamo maoy mobahad niya nga iya’ng bisyo hunongon, kamo na man nuon gihulga nga mabuak inyong pamilya kun sa inyong amahan kamo mosumbong. Kun pananglit magkabuwag inyong ginikanan, dili tungod kay nisulti mo sa inyong amahan unsa’y angay niya mahibaw-an, kun dili tungod mismo sa binuhatan sa inyo’ng inahan.

Angay makahibawo inyo’ng amahan, apan dili pa karon, labi na’g tua sa gawas, basin naa’y mabuhat nga iya’ng ikatiwas. Apan isumbalik sa inyong inahan ang bahad, nga kun dili siya moundang, kamo mismo motug-an sa inyong amahan.

Lagmit mopasalig, sulbad kun tinud-on. Apan ayaw kumpyansa. Kay ang tawo nga nagduwa sa kalayo, nasunog sa paglimod, pamakak ug pagtago tago. Wala siya karon sa insaktong kabuot, kay naputos sa kahimuot.

Pagmatngon, kun masakpan ninyo usab, biyai inyong inahan aron makatilaw unsa’y dangatan. Apan kay kamo menor de edad pa man, balhin mo sa inyo’ng lolo ug lola o dili ba kaha sa uyoan ug iyaan. Sultihi inyo’ng amahan nga deretso ihatag kaninyo ang sustento.

Sigurado inyong amahan maalerto, sa inyo’ng inahan mangutana ngano. Pasagdi unsaon niya’g panubag. Sigurado molimod dayo’g pasangil nga kamo ang yabag. Kun inyo’ng amahan mobalik pangutana ninyo, ingna inyo ra’ng inahan ang nakahibawo ngano. Lagmit siya mopauli ug inyo’ng inahan malisang, mapugos balik sa insaktong dalan. Apan kun magpadayon pagsalimuang, naa ra sa inyo’ng amahan unsa’y ilang dangatan. Kun sila magkabuwag man, dili kamo ug inyo’ng amahan ang mawad-an, kun dili ang inyo’ng inahan.

Tito Miguel