Tito Miguel
Dear Tito Miguel,
Akong silingan ba, arte kaayo. Pa sosyal kaayo bisa'g walay ikabuga. Gandang ganda sa sarili pa gyud. Baho raba'g baba. Dili sa pag-unsa bitaw, Tito Miguel, baho siya'g gininhawa gyud. Gitarong na ma na'g sulti sa una, nanuyo man nuon. Unya manumbay mani siya diri's amoa, makigchika, lain sab dili nako atubangon. Unsaon mani nako pagsulti nga dili masuko sama sa nahitabo sauna? —Tess
Tess,
Depende unsa imong intensyon sa pagsulti niya. Kun tuyo nimo aron lang siya makahibawo, di na nimo kinahanglan sultian, kay nakahibawo na man siya daan.
Kun gusto ka matabangan siya, ipaagi sa iyang pamilya. Sultihi iyang inahan o dili ba kaha igsuon nga siya agnihon mokonsulta’g doktor kay lagmit sintomas kini sa problema sulod sa iya’ng lawas. Mas maayo ngadto ka sa pamilya mosulti kaysa ubang tawo. Kinahanglan niya ang tabang, dili libak sa mga silingan. Kun maikog ka moduol sa iyang pamilya, pasagdi na lang. Kun ing ana kaisog ang baho, makasugat gihapon siya’g laing tawo nga kaniya mopahibawo. Lagmit gani hasta iyang pamilya gisultian na siya. Tingali iya lang gilimod sa iyang kaugalingon.
Ang problema kay manumbay nimo, di malikayan masimhotan iyahang baho. Mahimo man dili nimo atubangon labi na sa pandemya karon. Pangayo’g dispensa nga sa online chat na lang mo magchika kay nagsuroy suroy pa ang corona. Ingna imong tibuok pamilya nakahukom nga samtang naa pa ang hulga sa corona, sa inyong balay walay laing pasudlon. Kun dili siya kasabot sa imong rason, iyaha na nang problema. Basta ikaw nanalipod sa imong kaugalingon ug sa imo’ng pamilya, dili lang gikan sa baho niya, kun dili batok corona. Lagmit siya malain sa imong pagbalibad ug kanimo mopalayo. Ayaw kaguol. Imo’ng problema nasulbad ra’g iyaha. —Tito Miguel
- Latest